曾經聽過一個故事，發人深省，想同大家分享下。
傳說有兩位婦人爭認係同一個BB嘅媽媽，事情越鬧越大，終於鬧到去到國王度。國王見面前兩位婦人聽落都各有理由，既然證明唔到邊個先係真正嘅媽媽，就唯有將面前嘅BB用刀一分為二啦，一人分一半咁就最公道。聽到裁決之後，婦人A激動得馬上咁向國王求情，話自己唔再爭喇，就將BB交畀婦人B吧，只要將BB留活口自己就別無所求。而旁邊嘅婦人B只係冷冷咁笑，佢話既然分唔出勝負，就由國王將BB一分為二吧。故事講到呢度，相信邊個先真正係BB嘅媽媽大家都心中有數吧。
關於貓咪嘅安排，一直以嚟嘅計劃都係人類先返香港睇下能唔能夠長住（例如老公適唔適應到等等），定係會回瑞典。幾個月嘅過渡期間貓咪會畀愛貓親戚照顧住，呢幾個月內我哋會決定要接貓咪去香港定返瑞典一家團聚。無論我哋搬去世界任何一個角落，我哋都唔會放棄巴仔。呢個決定亦已經講咗唔少次，有留意開嘅讀者亦一定會知我對我隻貓嘅瘋狂程度係去到邊。
動物唔同人，坐一程飛機對佢哋嚟講係好大件事，而且分分鐘會有意外發生。仲要係非直航嘅歐洲長途機，來回香港只能坐cargo。喺我連自己同老公都未知自己將來何去何從嘅時候，我哋唔想貿貿然帶隻貓返香港，然後又分分鐘要貓貓坐多程冤枉機。雖然而家將會幾個月見唔到貓咪，係會好掛住，但呢個係我同我老公認為對貓最好嘅安排。
同一撮人，由10月起就不斷以千百種「理由」去狙擊同騷擾我。佢哋每日都會喺唔同平台出好多個post，先話我掛住喺瑞典屋企撚貓唔share指定文宣，到翻箱倒櫃斷章取義人身、人格攻擊，咩都講到似層層，又話我返香港係為寫書賣廣告賺錢（行外人都知寫書最唔賺錢，除非係J.K.羅琳，真睇得起我。廣告雖然係我呢行嘅主要收入，但喺瑞典我都可以照賣廣告。我倒想知咩廣告咁開心可以令我風生水起，帶埋個做醫生但唔識中文嘅老公返嚟。），又話養貓係為呃like，而家仲去到誣衊我棄養。有心人仲特登開晒Instagram account整晒圖，又tag晒我好多認識嘅人、朋友、合作緊嘅機構等等。到底係對人定對事，相信大家都有眼睇。
雖然呢撮人最初用「唔照意思share指定文宣，已讀不回」為名討伐我，但希望大家唔會因為呢件事對香港後生仔女產生任何負面感覺。因為相信真正關心香港嘅人，唔會喺呢個時候仲日日用各種理由走去狙擊批鬥一個三唔識七嘅網絡人。只能說呢一撮人別有用心，大家要小心分化。
非常感激一班始終如一相信我嘅讀者。多謝大家對巴仔同我哋一家關心，我們會繼續幸福下去的。
Search